Gaurkotasuna

Ikasturteko lehen Merka2dasoak balantze positiboa utzi du

Pasa den igandean, Mugikortasunaren Europako Astearen baitan Irunen egindako bigarren eskuko patinete elektrikoen eta bizikleten merka2dasoak balantze oso positiboa utzi du.

Merkatuan zehar, salgai jarri ziren 104 patinete eta bizikletetatik 60 bizikleta eta bi patinete elektriko saldu ziren, hau da, eskuragarri zeuden artikuluen % 59. Gainera, egun osoan zehar bildutako jende andanak ekimen honen arrakasta azpimarratzen du.

Txinzerrek eskerrak eman nahi dizkie herritarrei eta, beste behin, Merka2dasoa ekitaldi arrakastatsua eta gogoangarria izan zedin lagundu zuten guztiei. Eskerrik asko guztioi! Jarrai dezagun mugikortasun iraunkorraren aldeko apustua egiten.

Bigarren eskuko bizikleten azoka Irunen, Mugikortasunaren Europako Astearen barruan

Bigarren eskuko bizikleten azoka Irunen, Mugikortasunaren Europako Astearen barruan

• Datorren igandean, irailaren 17an, ospatuko da Irungo Zabaltza plazan, 10: 30etik 14: 00etara.

• Bizikletak saldu nahi dituztenek hitzordua eskatu beharko dute www.txinzer.eus webgunearen bidez.

Irun, 2023ko irailaren 8a. Datorren igandean, irailaren 17an, Txingudiko Zerbitzuak antolatutako bigarren eskuko patinete elektrikoen eta bizikleten azoka egingo da, Mugikortasunaren Europako Asteko programazioaren baitan. Ekitaldia Irungo Zabaltza plazan izango da, 10: 30etatik 14: 00etara.

Merka2dasoaren helburu nagusia mugikortasun jasangarria eta hiri-hondakinen murrizketa sustatzea da, herritarrei patinete elektrikoak eta bizikletak berrerabiltzeko topagune bat eskainiz. Horregatik, salgai jartzen diren patinete elektriko eta bizikleta guztiak jada erabilitakoak izan beharko dute eta egoera onean egon. Ezingo da material berririk edo stockik saldu.

Adin nagusikoek bakarrik hartu ahal izango dute parte eta NANa eta telefono zenbakia eman beharko dituzte. Bizikleta eta patinete elektrikoak bakarrik onartuko dira, eta inoiz ez 500 €-tik gorako prezioan.

Leire Zubitur Txingudiko Zerbitzuen kudeatzaileak merkatuan parte hartzera gonbidatu ditu herritarrak, eta Bidasoa eskualdean ekonomia zirkularra sustatzearen garrantzia azpimarratu du. Zubiturren arabera, “funtsezkoa da materialen eta baliabideen bizitza erabilgarria luzatzea hondakinak ahalik eta gehien murriztuz, eta Merka2dasoa ikasturte berria kalitatezko bizikleta eta patinete elektrikoekin hasteko modu aparta da, prezio eskuragarrian erosteaz gain, ingurumena zaintzen baita”.

Patinete elektrikoa edo bizikleta saldu nahi duenak aurretiazko hitzordua eskatu beharko du txinzer.eus webgunean edo 900 119 384 telefono zenbakira deituta.

Jai garbiago eta iraunkorragoen aldeko konpromiso irmoa

• Guztira 16.416 edalontzi berrerabilgarri banatuko dira sei txosnetan.

• Jaietan, inbertsio ekonomikoa % 53 handituko da. Ohiko zerbitzua indartu egingo da, eta 55 lanaldi gehiago egingo dira guztira.

‘Ospatu eta zaindu ingurumena! Gozatu jaiak arduraz eta birziklatu leloarekin bat eginez’ Txingudiko Zerbitzuak prest dago Guadalupeko Ama Birjinaren jaiei hasiera emateko. Aurreko urteetan bezala, irailaren 1etik aurrera dispositibo berezi bat zabaldu da, giza baliabideak eta baliabide teknikoak areagotuz, jai garbiagoak eta ingurunearekiko errespetuzkoagoak bermatzeko konpromisoarekin.

Kaleak garbi mantentzeko, zerbitzu erregularra indartuko da irailaren 3tik 11ra. Leire Zubitur Txingudiko Zerbitzuen kudeatzaileak 11.727,96 €-ko inbertsio ekonomiko gehigarria iragarri du, hau da, ohiko kostua baino % 53 handiagoa.

Baliabideak handitzea eremu estrategikoetan

Valentín Gonzálezek, hondakinen eta hiri-garbiketaren arduradunak, jaietan zerbitzuak izan dituen hobekuntzak azpimarratu ditu: “Jaiegunetan zehar langileen kopurua handituko da, 55 lanaldi gehiago emango dira, jaiegun guztietan kale garbiak bermatzeko”. Gonzalezen arabera, garbiketa-brigadak eguneko lehen orduetatik jende gehien biltzen den eremuak errazteko eta urez garbitzeko antolatuko dira. Gainera, hala behar duten irlatxoak husteko maiztasuna handituko da.

Edalontzi berrerabilgarriak

Aurten, Txingudiko Zerbitzuakek 16.416 edalontzi berrerabilgarri jarriko ditu Bentako sei txosnen eskura, horietako bakoitzerako 2.736. Erabilera mekanika ohikoa izango da, Zubiturren esanetan: “Edalontziak euro batean egongo dira eskuragarri txosnetan, eta nahi beste aldiz erabili ahal izango dira. Ondoren, edalontzia txosnan entregatzean, euroa itzuliko da. Horrela, erabili eta botatzeko plastikozko ontzien bolumena murriztu nahi da, eta jaietan sortzen diren hondakinak minimizatu”. Jaiak amaitutakoan, Txingudiko Zerbitzuak, itzultzen diren edalontzi guztiak biltzeaz arduratuko da, eta enpresa espezializatu batean garbituko dira, ondoren erabiltzeko.

Birziklatzeko gune bereziak

Aurreko urteetan bezala, birziklatzeko 15 gune berezi jarriko dira joan-etorri handieneko guneetan, behar bezala seinaleztatuta eta gaikako bilketari begira.

2 Butron pasealekua

4 San Pedro kalea

2 Arma Plaza

1 Kasino Zaharra

2 Azoka-esparrua

2 Zezen-plaza

2 Jostaldi

Bestalde, txozna bakoitzak 120Lko hiru edukiontzi izango ditu hondakin organikoetarako, ontzietarako eta beirarako. Era berean, kanpoaldean txozna guztiek erabiltzeko beirarako hiru iglu eta kartoizko ontzietarako edukiontzi handiak jarri dira.

Txingudiko Zerbitzuak-ek gogorarazi nahi du hartutako neurri horiek ondorioak izateko gakoa hondakinen sorrera murriztea dela, eta herritarrei dei egiten zaie neurri horiek errespetatzeko, birziklatzeko eta gaikako bilketarako guneak erabiltzeko.

Albiste gehiago...