Txingudiko Zerbitzu Mankomunitateko Batzarrak bilera egin du gaur, abenduak 27, honako erabaki hauek hartzeko:
Lehenik eta behin, 2024rako aurrekontua onartzea eta 15 egunez jendearen eskura jartzea. 2024ko ekitaldirako prestatutako aurrekontuak uraren ziklo integraleko, hondakinen ziklo integraleko eta kale-garbiketako zerbitzuen kostu bateratuak jasotzen ditu. Halaber, jarduera bakoitzaren garapenari lotutako diru-sarrerak eta gastuak zehazten dituzten Aurreikusitako Emaitzen Kontuak aurkezten dira, onartutako tarifa-sistemaren arabera, 2023ko ekitaldiaren itxieraren zenbatespenarekin alderatuta. Estimazio horiek egiteko, egungo egoera ekonomikoaren (inflazioarena) diru-sarreretan eta gastuetan zenbatetsitako eragina eta 2024 urtean izan dezakeen bilakaera hartu dira kontuan.
2024rako aurrekontu bateratua (Mankomunitatearena eta Txingudiko Zerbitzuak sozietatearena batuta) 36.601.473 eurokoa da guztira.
URA:
2024ko ekitaldirako, onartutako tarifak % 7,5 igoko dira 2023ko ekitaldikoekin alderatuta. Hala, tarifen araberako diru-sarrerak 10.508.215 eurokoak izango direla kalkulatzen da. Kontsumo-zifra horien zenbatespenean, kontuan hartu da 2022az geroztik izaten ari den etxeko kontsumoaren beheranzko joera, bai eta etxekoa ez den kontsumoaren neurrizko hazkundea ere. Hala ere, 2024an kontsumoa murrizten jarraitzea aurreikusten da, Covid-19aren osasun-krisiaren aurreko urteetan zegoen joerari jarraituz.
Aurten, uraren jarduerarako aurrekontua 16.730.733 €-koa da, iazko aurrekontua baino ia % 9 handiagoa. Gainera, gastu arrunta aurreko urtearen aldean % 4,1 hazi denez, 2024rako inbertsioak % 15,5 handituko dira, batetik, tarifen igoerari esker eta, bestetik, aurreko urteetako baliabide propioen eskuragarritasunari esker. Ondorioz, 7.689.409 euroko inbertsioak egitea aurreikusten da.
Inbertsio nagusiak
2024ko ekitaldirako Uraren Ziklo Integralaren jarduerarako inbertsioa 7.689.409 €-koa da, 1.867.792 euro hurrengo ekitaldiko baliabideekin finantzatuko direlarik eta gainerakoa aurreko ekitaldietako gerakinarekin.
Ur-bilketaren eta baliabideen eremuan, jarduketa nagusia Endarako urtegiaren instalazioak hartzen dituen etxola birmoldatzea eta urtegi horren instalazio teknikoak berritzen amaitzea izango da. Era berean, Domikoko presa Birgaitzeko Proiektu Integralaren idazketa osatuko da. Proiektu horrek, bere antzinatasuna dela eta, egitura, iragazgaiztea eta instalazioak hobetzeko berehalako eskuhartzeak eskatzen ditu.
Ur-hornidurako zerbitzuan, Errandoneako depositua berreraikitzeko obrak egingo dira, hirurogeita hamarreko hamarkadan eraikitako deposituak birgaitzeko prozesuaren zati gisa. Banaketa-sareei dagokienez, azpimarratzekoa da Errandoneako depositutik Hondarribiko erdigunera doan banaketa-arteria nagusiaren berritzea Jaizkibel etorbideari dagokion zatian, eta berritzeak egitea, Irungo eta Hondarribiko udal-urbanizazio-obrekin bat etorriz.
Saneamendu-sareei dagokienez, zangarik gabeko birgaitze-jarduketak aurreikusi dira, bai eta hornidura-obrei lotutako hainbat eskuartze Irun eta Hondarrribiako auzoetan.
Hiri-drainaduraren eremuan, Uranzu inguruan ekaitz-tanga bat eraikitzeko proiektuaren idazketa amaitzea eta eraikitzen hastea aurreikusten da, bai eta gainezkabideen ekipamendua ere, isurketak kontrolatzeko legeria berria betez. Hondarribiko saneamendu-sarea sektorizatzeko lanekin ere jarraituko da.
Azkenik, nabarmentzekoa da TXINZERen Digitalizazio Proiektuan jasotako lehen jarduketen aurrekontuko inbertsioak sartuko direla, estolderia garbitzeko saneamendu-ibilgailu bat erosi dela eta TXINZERek Irungo Juncal kalean dagoen jendaurreko bulegoaren birgaitze-lanak hasiko direla.
HONDAKINAK:
2024an, zerbitzuaren kostuen igoera orokorra dela eta, abonatuen tarifak % 10 igoko dira, gaikako bilketari atxikitako Etxeak izan ezik - horien igoera % 5ekoa izango da-. Nabarmentzekoa da gaikako bilketa egiten duten etxeetako tarifa ez dela igo 2018tik
Hondakinen jardueran, 2024ko ekitaldirako aurreikusitako gastu arrunta zertxobait handiagoa da ( % 7,54) 2023ko aurrekontuan aurreikusitakoa baino. Inbertsioetarako partida % 57 handitu da 2023ko ekitaldiarekin alderatuta; izan ere, ekitaldi honetan aurreko urteetan erositako hainbat ibilgailu iritsiko dira entrega-epe luzeen ondorioz, edukiontzi organiko guztiak eta dagozkien sarraila elektronikoak berritzearekin batera. 2024an 2.125.338 euroko inbertsioak egitea espero da. Horretarako, 2024an sortutako baliabide propioak (453.041 €), aurreko ekitaldietako soberakinak (615.089 €) eta kanpoko baliabideen 1.057.208 € (mailegua) erabiliko dira.
Inbertsio nagusiak
1.155.000 euroko balioarekin, hurrengo ekitaldirako inbertsiorik esanguratsuenak honako hauek izango dira: hondakinak aurrez biltzeko ibilgailu berriak erostea, atzeko kargako 3 ibilgailu, alboko zama-hondakinak biltzeko ibilgailu bat eta edukiontzi-garbigailu bat. Gainera, bilketa organikorako edukiontzi guztiak berrituko dira, dagozkien sarraila elektronikoekin, 2021ean hasitako berrikuntza amaitzeko. Hiriguneetan garbigune txikiak jartzen jarraitzea ere aurreikusten da, etxetresna elektriko txikiak, bonbillak, CDak eta abar jasotzeko puntuak errazteko.
LAGUNTZAK:
Indarrean diraute kalteberatasun-egoeran dauden familientzako laguntzak, eta horrek uraren eta zaborren ordainagiriaren % 50etik salbuesten ditu. Laguntza hau, batez ere, diru-sarrerak bermatzeko errenta jasotzen duten pertsonei zuzenduta dago. Gainera, ezinbestekoa da edukiontzi marroiaren edo autokonpostaje-sistemaren kanpainan alta emanda egotea, eta hala izan ezean, laguntza eskaera egin aurretik egin ahal izango dute. Bestalde, uraren kontsumo jasangarria egin beharko dute laguntza jasotzeko, hau da, biztanleko eta eguneko 120 litro baino gehiago ez kontsumitzea.