Gaurkotasuna

• Bulego honen helburu nagusia entitatearen zerbitzuak Hondarribiko herritarrei hurbiltzea da, Txinzerren funtsezko zutabeetako baten isla: gertutasuna.
• Bulegoa zabaldu zenetik, ehun pertsonatik gora artatu dira.

Leire Zubitur, Txingudiko Zerbitzuen gerentea, eta Igor Enparan, Mankomunitateko lehendakariordea eta Hondarribiko alkatea, Txinzerrek Hondarribiko BAZen duen arreta-bulegoan izan dira gaur goizean, urtarrilaren 8an zabaldu ondoren. Bulego honen helburu nagusia entitatearn zerbitzuak Hondarribiko herritarrei hurbiltzea izan da, astelehenero goizeko 8:30etatik arratsaldeko 14:00etara zuzeneko arreta eskainiz.

Leire Zubitur Txinzerren gerentea pozik agertu da ekimenarekin, eta erakundeak herritarrekiko hurbiltasunarekin duen konpromisoa azpimarratu du: "Hondarribiko BAZen bulego hau ireki izanak argi eta garbi erakutsi du zerbitzua ematen diegun herritarrekin loturak ezartzen dihardugula. Gertutasunaren aldeko apustua egin dugu beti, eta hau konpromiso horren isla da ", adierazi du Zubiturrek.

Ireki zenetik, bulegoak ehun pertsonatik gora artatu ditu urtarrila eta otsaila bitarte, eta horrek "zerbitzu berri honek Hondarribiko herritarrentzat duen interesa eta erabilgarritasuna" islatzen du. Zubiturren arabera, pertsonak ondorengo izapideak egitera gerturatu dira nagusiki: titulartasun-aldaketak egitera, DSBE laguntzak tramitatzera (tarifa kaltebera), fakturaren bat kobratzera, hondakin organikoen poltsak jasotzera eta fakturei buruzko informazioa lortzera (batez ere CMO).

Bestalde, Hondarribiko alkate Igor Enparanek azpimarratu du oso garrantzitsua dela horrelako zerbitzua ematea Hondarribiko herritarren ongizaterako: "Udal Gobernu Taldearen Agintaldi Planean jasotzen da bulego hau zabaltzea eta gauzatu zedin lanean jardun dugu. Albiste bikaina izan da gure bizilagunentzat, aukera ematen baitie kontsultak ebazteko eta izapideak egiteko Iruneraino joan behar izan gabe". Horrek, Txinzerren zerbitzuak eskuragarriago egiteaz gain, denbora eta baliabideak aurreztu dizkie egoiliarrei: "Orain arte, zabor organikoaren poltsak lortzeko puntu bakarra zegoen, kiroldegian. Bereziki adineko pertsona askorentzat eragozpena zen, askorentzat urruti baitzegoen. Orain BAZen ere egiteko aukera ere badute ".

Nahiz eta bulegoak bi hilabete besterik ez daramatzan martxan, Zubiturrek eta Enparanek jaso duten feedbacka positiboa izan da. Hondarribian bulegoa irekitzea bi aldeek aspalditik egin nahi zuten zerbait zen, eta Txingudiko Zerbitzuek eta Hondarribiko Udalak bertako bizilagunen bizi-kalitatea hobetzeko elkarlanaren ahalegina islatzen du. Zubiturrek eta Enparanek azpimarratu dute "lankidetza estuan jarraitzeko konpromisoa" dutela "eskualdeko zerbitzu publikoetan eta, oro har, herritarrengan hobekuntzak bultzatzeko".

Leire Zubiturrek hondarribitarrengana ere jo nahi izan du bulegoaren ordutegia gogorarazteko eta edozein zalantza edo izapide egiteko hara joan daitezkeela jakinarazteko: “Hemen gaude entzuteko, laguntzeko eta haiekin batera lan egiteko, guztion onurarako irtenbideak bilatzeko”.

Martxoaren 1etik aurrera, Akartegiko garbigunearen ordutegia aldatuko dugula jakinarazi nahi dizuegu. Ordutegi berria honako hau izango da:

Bidasoa Beherea, 2024ko otsailaren 6a. Txingudiko Zerbitzu Mankomunitateko Organo Kudeatzaileko kideek bisita egin dute Txinzerren instalazioetara, entitatearen lana eta instalakuntzak hurbilagotik ezagutzeko. Leire Zubitur gerenteak lagunduta eta arlo bakoitzeko arduradunen azalpenekin, bisitaren helburu nagusia instalazio bakoitzean egiten diren eragiketen ikuspegi integrala eskaintzea izan da.

Eguna hasteko, Endarako urtegiaren barrunbeak bisitatu dituzte ura garraiatzeko erabiltzen den sistemaren zirrikituak ezagutzeko. Korporazioko kideak urtegiko egituraren barruan sartu dira, eta gertutik ikusi ahal izan dute nola hartzen den ura eta nola bideratzen den tunel eta hodietan barrena Araztegira iritsi arte. Bisitan zehar, urtegiaren eraikuntzari, sakonerari eta uraren kudeaketari buruzko datu interesgarriak ezagutu ahal izan dituzte, besteak beste.

San Antonek dituen sekretuak ezagutu ondoren, Edateko Uraren Tratamendurako Estazioa (EUTE) izan da hurrengo geltokia. Bertan, egunero etxeetan kontsumitzen dugun uraren kalitatea eta edangarritasuna bermatzen duen tratamenduaren fase bakoitza nola egiten den ikusteko aukera izan dute. Prozesu hori posible egiten duten makinak eta sistemak ezagutzeaz gain, EUTEren burmuin operatibo gisa jarduten duten aginte-koadroak ikusteko unea izan da, kalitate-estandarrak betetzen direla ziurtatzeko parametro bakoitza nola monitorizatzen eta doitzen den argi eta garbi ikusiz.

Bisita amaitzeko, Mankomunitateko kideak Hondakin Urak Tratatzeko Planta (HUA) modernoan izan dira, eta saneamendurako eta ingurunea babesteko egiten diren funtsezko prozesuak ezagutu dituzte. Bisitaren azken zati honi esker, agerian geratu da Txinzerren eragiketen ezaugarri diren iraunkortasunarekiko eta ingurumenarekiko errespetuarekiko konpromisoa.

Leire Zubitur gerenteak Irun eta Hondarribiko zinegotzien parte-hartzearen garrantzia azpimarratu du, horietako asko Mankomunitatearen parte baitira: “Funtsezkoa iruditzen zait uraren ziklo integralean dugun ondarea ezagutzea, gure instalazioetan egiten den lanari buruz informatuta eta inplikatuta egon daitezen. Uraren ziklo integrala kudeatzeko prozesuan interes handia erakutsi dute erakutsi dute, eta uste dut oso bisita aberasgarria izan dela guztiontzat”.