Gaurkotasuna

Bidasoa Beherea, 2026ko otsailaren 10a. Txingudiko Zerbitzu Mankomunitateak 2026ko jarduerarako kontuak onartu ditu, 41 milioi eurotik gorako zenbatekoarekin. Horrek pasa den urtearekin alderatuta % 5eko igoera dakar, eta Mankomunitatearen historiako aurrekonturik handiena da. Aurrekontu plangintza hau Irungo eta Hondarribiko funtsezko zerbitzu publikoen hobekuntza lortzera bideratu da, azpiegituretan inbertsioak handituz eta herritarrei eskaintzen zaizkien zerbitzuen digitalizazio eta modernizazioaren aldeko apustu sendoa eginez. Oro har, aurrekontu honek bi udalerrietan uraren ziklo integralaren kudeaketatik, hondakinen bilketa eta tratamendutik eta kale-garbiketatik eratorritako kostuak bere gain hartzea ahalbidetuko du.

Inbertsiora eta zerbitzuen hobekuntzara bideratutako aurrekontua

Aurrekontu proposamenak nabarmen indartzen du inbertsioen kapitulua, bereziki uraren arloan, azpiegiturak modernizatzeko eta eraginkortasun operatiboa hobetzeko helburuarekin. Era berean, zerbitzuen kudeaketa jasangarriago eta digitalizatuago baterantz aurrera egitea ahalbidetuko du.

Aurrekontuaren banaketa arloka honakoa da:

• Uraren Ziklo Integrala: 19.714.764 €
• Hondakinen kudeaketa: 14.777.440 €
• Kale-garbiketa: 6.788.299 €

Uraren ziklo integrala: tarifa-egitura berria, inbertsioa eta digitalizazioa

Uraren ziklo integralera bideratutako aurrekontua 19.714.764 eurokoa da, aurreko jarduerekin alderatuta % 8ko igoerarekin. 2026rako, kontsumo aldakorren tarifa-egituran aldaketa bat onartu da, fakturazio linealeko sistematik tarteka egituratutako eredu batera igaroz. Aldaketa horrek kontsumo-bolumenaren araberako prezio desberdinak ezartzea dakar, 2025eko tarifak erreferentziatzat hartuta. Testuinguru horretan, lehen kontsumo-tartea % 2,5 igoko da.

Tarifen bidezko diru-sarrerak 11.530.140 eurora iristea aurreikusten da, kontsumo globalaren joera egonkor baten barruan.

Uraren zikloko inbertsioak 9.661.547 eurora iritsiko dira, aurreko urtearekin alderatuta % 11,6ko igoerarekin. Inbertsio horiek Europar Batasunaren eta Uraren Euskal Agentziaren dirulaguntzen bidez, aurreko ekitaldietako soberakinen bidez eta baliabide propioekin finantzatuko dira.

Lan esanguratsuenen artean daude Endarako urtegiaren etxolaren birgaitzea, Irungo eta Hondarribiko hornidura-sareen hobekuntza, saneamendu- eta hiri-drainatze sareetan egindako lanak, eta URAMUGA mugaz gaindiko proiektuaren jarraipena, kolektoreetara sartzen diren ur parasitarioen sarrera murriztea helburu duena.

Era berean, digitalizazioaren aldeko apustuak jarraitzen du Txingudi Data Driven Bay (TD2B) proiektuaren bidez. Proiektu horrek 2026an Smart Water Center baten ezarpena lantzea ahalbidetuko du, hiri uraren zikloaren kudeaketa adimendunerako ardatz nagusi gisa.

Hondakinen kudeaketa eta kale garbiketa: zerbitzuaren jarraitutasuna eta ekipamenduen berritzea

Hondakinen kudeaketaren eta kale garbiketaren arloan, 2026ko aurrekontuak zerbitzuaren kostuen igoeraren eragina jasotzen du. Tarifak % 3 eguneratuko dira, salbuespen gisa, gaikako bilketara atxikitako etxebizitzek % 2,5eko igoera izango dutelarik.

Irungo eta Hondarribiko kale garbiketarako aurrekontua 6.788.299 eurokoa da, bi udalerrietan zerbitzuaren ohiko prestazioa bermatuz.

Aurreikusitako inbertsioak 1.609.600 eurokoak dira, eta batez ere ibilgailu berriak eskuratzera, bilketa-sistemak hobetzera, edukiontziak berritzera eta ekipamendu teknologiko berriak txertatzera bideratuko dira.

Familiei babesa eta konpromiso soziala

Aurrekontuak egoera ahulean dauden familientzako laguntza sozialak mantentzen ditu. Laguntza horiei esker, uraren ordainagiriaren eta zabor-tasaren % 50eko salbuespena aplika daiteke, betiere ezarritako baldintzak betetzen badira eta uraren erabilera arduratsua egiten bada.

Halaber, familia ugarientzako tarifa espezifiko bat jarri da martxan, etxebizitzan bizi diren pertsonen kopuruaren arabera kontsumo-tarteak egokituz. Horrela, kontsumoaren banaketa bidezkoagoa sustatzen da, eta baliabidearen erabilera jasangarria bultzatzen da.

Hobari hau aplikatzeko, baldintza batzuk bete behar dira, besteak beste etxebizitzan bizi diren pertsonen kopurua egiaztatzea. Baldintza horiek erakundearen webgunean kontsulta daitezke. Modu horretan, Mankomunitateak familia ugariei laguntza ematea eta baliabidearen kudeaketa eraginkor eta jasangarria uztartu nahi ditu, tarifa-sistemaren bidezkoagoa bermatuz. Txingudiko Zerbitzuak-etik baldintzak betetzen dituzten herritarrak modalitate horretara batzeko gonbita egiten da, bai Herritarrentzako Arreta Bulegoaren bidez, bai webgunean eskuragarri dagoen formularioaren bitartez.

2026ko jarduera aurrekontu honek Txingudiko Zerbitzuen Mankomunitatearen apustua sendotu nahi du, kalitatezko zerbitzu publikoetan lanean jarraitzeko, azpiegiturak modernizatzeko, digitalizazioa bultzatzeko eta jasangarritasuna indartzeko. Oinarri nagusia Irungo eta Hondarribiko herritarren bizi-kalitatea etengabe hobetzen jarraitzea izango da.

Gaur, 2026ko otsailaren 10ean, Txingudiko Zerbitzuen Mankomunitatearen Ezohiko Batzarra egingo da Perujaraneko bulegoetan. Saioa zuzenean jarraitzeko, egin klik hemen.

Bidasoa Beherea, 2025eko urtarrilaren 28a. Joan den urtarrilaren 1etik indarrean dago Txingudiko Zerbitzu Mankomunitateak 2026. urterako onartutako ur-zerbitzuaren tarifa egitura berria, kontsumoaren araberako fakturazio sisteman oinarritua. Otsailean herritarrek urtarrileko ur-kontsumoari dagozkion lehen fakturak jasoko dituzte, eredu berria aplikatuta.

Orain arte, kontsumitutako metro kubiko guztiak prezio berean fakturatzen ziren. Proposamen berriarekin, ordea, uraren kostua egindako kontsumoaren arabera aldatzen da: kontsumo eraginkorrentzat prezio baxuagoak ezartzen dira, eta kontsumo handientzat, berriz, prezioak progresiboki handiagoak dira. Horrela, fakturak etxebizitza bakoitzaren kontsumo ohiturak modu zehatzagoan islatzen ditu, eta uraren erabilerak duen eragina argiago identifikatzeko aukera ematen du.

Onartutako ereduak hiru kontsumo tarte ezartzen ditu, bai etxeko erabileretarako bai etxez kanpokoetarako: lehen tartea kontsumo eraginkorrei lotuta dago, bigarrena ohiko kontsumoei dagokie, eta hirugarrena kontsumo handientzat da. Sistema honek bereizketa egiten du uraren erabilera arduratsua egiten dutenen eta kontsumo handiagoak dituztenen artean.

Egindako azterketen arabera, Bidasoa Behereko etxebizitzen batez bestekoa hiru pertsonatik beherakoa da. Profil hori erreferentziatzat hartuta, eta pertsonako eta eguneko gutxi gorabehera 90 litroko kontsumo eraginkorra kontuan izanik, tarifa egitura berriaren eragina txikia da kontsumo arduratsuak dituzten etxebizitzentzat.

Etxez kanpoko abonatu nagusien kasuan ere, hileko batez besteko kontsumoa 20 metro kubikotik beherakoa denean, tarifa berriaren eragina moderatua da.

Horrez gain, ordenantza berriak tarifa espezifiko eta bereziak jasotzen ditu, hala nola familia ugarientzako tarifa, etxeko tarifa berezia —galdaretarako…— eta nekazaritza/abeltzaintzako tarifa.  Modalitate horiei etxeko erabileren pareko baldintzak aplikatzen zaizkie. Kategoria horiek gaur egun indarrean dagoen tarifa sozialari gehitzen zaizkio; tarifa soziala indarrean mantentzen da eta baldintzak betetzen dituzten pertsonei tarifa arruntarekiko %50eko murrizketa aplikatzen zaie. Tarifa berezi horien eskaera bai telematikoz, www.txinzer.eus webgunearen bidez, baita Bezeroen Arretarako Bulegoan bertaratuta egin daiteke.

Kontsumoaren araberako fakturazio sistema ezartzeak uraren erabilera arduratsua sustatuko duen eredu bidezkoago, orekatuago eta jasangarriago baterantz aurrera egiteko borondateari erantzuten dio. Era berean, zerbitzuaren bideragarritasun ekonomikoa bermatzen du, eta lurraldeko azpiegitura hidraulikoak berritu eta modernizatzeko beharrezkoa den inbertsio gaitasuna mantentzea ahalbidetzen du.

Edozein zalantza argitzeko, Mankomunitateak herritarren eskura jartzen ditu ohiko arreta kanalak, non tarifa egitura berriari eta fakturen irakurketari buruzko informazioa eskatu daitekeen.