Gaurkotasuna

Jaietan, inbertsio ekonomikoa % 67 handituko da. Dispositibo teknikoa zein pertsonala indartuko dira, 85 lanaldi gehiagorekin.

Guztira 18.000 edalontzi berrerabilgarri banatuko dira Bentako sei txosnetan.

Hondarribia, 2024ko irailaren 4a. Guadalupeko Ama Birjinaren jaiak hastear daude, eta Txingudiko Zerbitzuakek, Hondarribiko Udalarekin elkarlanean, prest du hiri-garbiketarako eta hondakinak biltzeko zerbitzu berezia. Irailaren 1etik irailaren 12ra bitartean, giza baliabideak eta baliabide teknikoak nabarmen indartuko dituen dispositibo berezia izango da martxan. 

Egun hauetan guztietan langileen errefortzua ezarriko da, 85 lanaldi gehigarrirekin, Hondarribiko kaleak garbi eta txukun mantentzen direla ziurtatzeko. Leire Zubitur gerenteak azaldu duenez, inbertsio ekonomiko gehigarria 15.396 €-koa izango da, hau da, ohiko zerbitzuaren kostua baino % 67 gehiago. Ohikoa denez, arreta berezia eskainiko zaie gune estrategikoei. “Garbiketa-brigadak eguneko lehen orduetatik jende gehien biltzen den eremuak garbitzeko antolatuko dira. Gainera, behar duten irlatxoen hustuketa maiztasuna handituko da”, nabarmendu du Valentín Gonzalezek, hondakin eta kale-garbiketa arduradunak. 

Zubiturren iritziz, herritarren laguntza ezinbestekoa izano da jaietan kaleak garbi mantentzeko: “Gakoa hondakinen sorrera ahalik eta gehien murriztea da. Herritarrei dei egin nahi diet errespetuz jokatzeko, birziklatzeko eta gaikako bilketa-guneak erabil ditzaten eskatzeko. Keinu bakoitzak balio du. Gutako bakoitza hondakinak murrizten saiatzen bada eta behar bezala birziklatzen badu, jai garbiagoak eta jasangarriagoak izango ditugu. Gure hiriarekiko errespetua funtsezkoa da ingurumenarekin harmonian dauden jaiez gozatzeko”.

Birziklatze-guneak

Hondakinen kudeaketari dagokionez, birziklatzeko 14 gune berezi jarriko dira jende gehien pilatzen den guneetan, gaikako bilketarako seinale argiekin:

2 Butron pasealekuan

2 Arma Plazan

1 Kasino Zaharrean

2 azoka-esparruan

1 zezen-plazan

2 Jostaldin

Gainera, txosna bakoitzak 120Lko hiru edukiontzi izango ditu hondakin organiko, ontzi-arin eta beirarako. Era berean ,kanpoaldean, txosna guztiek erabiltzeko moduko beirarako hiru iglu eta kartoizko ontzietarako edukiontzi handiak jarri dira. Materia organikoa egunero bilduko da.

Edalontzi berrerabilgarriak: jasangarritasunaren aldeko apustua

Erabilera bakarreko edalontzien erabilera murrizteko eta ahalik eta hondakin gutxien sortzeko, Txingudiko Zerbitzuek 18.000 edalontzi berrerabilgarri banatuko dituzte Bentako sei txosnatan, 3.000 bakoitzeko. Sistema ohikoa izango da: edalontziak euro batean egongo dira eskuragarri txosnetan, eta nahi beste aldiz erabili ahal izango dira. Ondoren, edalontzia txosnan entregatzean, euroa itzuliko da. Jaiak amaitutakoan, Txingudiko Zerbitzuak, itzultzen diren edalontzi guztiak biltzeaz arduratuko da, eta enpresa espezializatu batean garbituko dira, ondoren erabiltzeko.

Txingudiko Zerbitzuek eta Hondarribiko Udalak gogorarazi nahi dute neurri horien arrakasta, hein handi batean, herritarren lankidetzaren mende dagoela. “Goza ditzagun jaiak ingurumenarekiko benetako konpromisoa erakutsiz. Egin dezagun gure kaleekiko errespetuaz ospakizunaren funtsezko zati bat. Jar ezazu zure aletxoa eta lagundu jaiak ingurumenarekiko errespetuzkoak izan daitezen!”, gogoratu du Ortzi Alonso Kultura zinegotziak.

 Irun, 2024ko abuztuaren 23a. Txingudiko Zerbitzuakek kontsulta publikorako epea hasi du, Bidasoa Behereko eskualdeko eragileek eta herritarrek, oro har, iradokizunak eta kezkak adieraz ditzaten Irun eta Hondarribiko udalerrietan hiri-hondakin solidoen kudeaketari dagokionez.

Ekimen horrek izapidetzeari hasiera emango lioke, 2001etik indarrean dagoen Hiri Hondakin Solidoen Kudeaketari buruzko Ordenantza eguneratzeko eta gaur egun bereiztearen eta birziklatzearen arloan dauden beharretara eta eskakizunetara egokitzeko. Indarrean dagoen Kudeaketa Ordenantza -eguneratu gabe dagoena- eskuragarri dago Txingudiko Zerbitzuen web orrian (www.txinzer.eus), Hondakinak ataleko Legedia azpiatalean.

Azken ordenantza onartu zenetik 20 urte baino gehiago igaro dira.  Urte hauetan guztietan hondakinen bilketak bilakaera handia izan du, eta hobekuntza handiak egin dira bereiztearen eta birziklatzearen arloan. Egungo araudian, ordea, ez dira islatzen. Ordenantza berriak hondakinen kudeaketa egokiari dagokionez herritarrek dituzten betebeharrak zehaztuko ditu, bai eta araudiak betetzen ez diren kasuetarako zehapen-araubide bat ezarri ere.

Ekonomia Zirkularrerako Hondakinei eta Lurzoru Kutsatuei buruzko apirilaren 8ko 7/2022 Legea betetzeko beharrari ere erantzuten dio ordenantzaren eguneratzeak. Lege horrek tokiko erakundeak behartzen ditu beren ordenantzak hondakinen arloko Europako zuzentarauetara egokitzera, indarrean dauden araudiak betetzen direla bermatzeko.

Ordenantza berriaren helburuak

Ordenantza berri honen onarpenarekin honako hau lortu nahi da:

• 7/2022 Legeak hondakinak biltzeko eta kudeatzeko ezartzen dituen betebehar berriak betetzen direla ziurtatzea.
• Herritar guztiek gaur egun dituzten legezko betebeharrak zehaztea.
• Gaur egun bereizita biltzen diren hiri-hondakin solidoen frakzio guztien definizioa eta erregulazioa egokitzea.
• Garbiguneen eta garbigune txikien erabilera-araubidea jasotzea eta arautzea..
• Hondakinak biltzeko eta kudeatzeko betebeharrak ez-betetzeak modu eraginkorrean zuzentzea ahalbidetuko duen zehapen-araubide bat ezartzea.

Herritarren parte-hartzea

Txingudiko Zerbitzuek kontsulta publikoan parte hartzera gonbidatzen ditu herritarrak eta erakunde interesdunak, ordenantza berriari buruzko iritziak eta iradokizunak eman ditzaten. Partaidetza-prozesua aukera bat da guztiok hondakinen kudeaketa hobetzen laguntzeko, gure eskualdea ingurune garbiagoa eta jasangarriagoa izan dadin. Iruzkinak bidaltzeko epea 2024ko irailaren 10ean amaituko da. 

Modu honetara egin daitezke ekarpenak:

1. Mezu elektroniko bat bidaliz txingudi@txinzer.eus helbidera, gaian "Hondakinen ordenantzari buruzko kontsulta publikoa" adieraziz.
2. Administrazio-prozedura erkideari buruzko araudian aurreikusitako edozein bide erabiliz.

Iradokizun guztiak jaso ondoren, ordenantzaren lehen zirriborroa egingo da, eta Mankomunitateak hasierako onespena emango dio zirriborroari. Ondoren, jendaurrean jarriko da, testu jakin batean oinarrituta, herritarrek testuari alegazioak egiteko aukera izan dezaten berriro.