Gaurkotasuna

Txingudiko Zerbitzuak-ek 9.350 ur-kontagailu berrituko ditu, herritarrak erdigunean jarriz zerbitzu eraginkorragoa eta jasangarriagoa eskaintzeko

Irun, 2025eko martxoaren 3a. Irungo eta Hondarribiko uraren teleirakurketa-sistemaren berritzeak kudeaketa eraginkorrago eta jasangarriagoa ahalbidetuko du, eta milaka etxebizitzari onura ekarriko die neurketa zehatzagoari eta ihesak goiz detektatzeko gaitasunari esker. Next Generation-EU Funtsek finantzatuta, Txingudiko Zerbitzuak 9.350 ur-kontagailu ordezkatzen ari da, teknologia aurreratua duten gailuekin, Suspertze, Eraldaketa eta Erresilientzia Planaren (PRTR) baitan.

Teleirakurketaren berrikuntzak aurrerapauso handia dakar hiri-uraren zikloaren digitalizazioan eta optimizazioan. Ekimen hau TXINGUDI DATA DRIVEN BAY (TD2B) Proiektu Estrategikoaren barruan kokatzen da, Lurralde Txikietako Hiri-Uraren Zikloaren Digitalizazioa sustatzeko helburuarekin. Proiektuari buruzko informazio osoa www.td2b.txinzer.eus webgune berrian dago eskuragarri.

Berrikuntza honi esker, gailuen konektibitatea hobetuko da, eta datuak denbora errealean bildu eta aztertzeko aukera emango du. Horrek ur-baliabideen kudeaketa eraginkorragoa eta jasangarriagoa sustatuko du, baliabideen erabilera optimizatuz eta herritarren arreta-zerbitzua hobetuz.

TD2B proiektuaren modernizazio-ekintzaren balioa 1.092.199 eurokoa da, eta horietatik 797.199 euro (%73) diruz lagunduko da. Gainera, ekimen honek konektibitate-zerbitzu bat beharko du 12 urtez irakurketak bidaltzeko, eta horrek 296.301,50 euroko kostu gehigarria izango du.

Sistemaren ezarpena kontratua sinatu ondorengo 8 hilabetetan egingo da, eta honako egutegia jarraituko du: kontagailuen %35 lau hilabetetan instalatuko da, %70 sei hilabetetan eta zortzi hilabeteko epean kontagailu guztiak ordeztuta izango dira.

Punta-puntako teknologia, zerbitzu eraginkorrago baterako

Azken 15 urteetan, Txingudiko Zerbitzuak hiri-uraren zikloaren digitalizazioaren aldeko apustua egiten ari da, neurketa aurreratuaren eta ur-baliabideen kudeaketa adimendunaren bidez. Helburua argia da: baliabideen erabilera optimizatzea eta herritarrei arreta hobea eskaintzea. Teleirakurketaren sistema berritzeak konpromiso hori indartzen du, gailuen konektibitatea hobetuz, zerbitzuaren kudeaketa optimizatuz eta denbora errealeko datu zehatzagoak eskainiz.

Informazio horri esker, analisi sakonagoak egin ahal izango dira, ur-sareko galerak hobeto kontrolatzeko, mantentze- eta eragiketa-kostuak murrizteko eta sarean sartzen den uraren eta benetan kontsumitzen denaren arteko erlazioa zehaztasun handiagoz ebaluatzeko. Horrez gain, ura banatzeko sarearen berritze-inbertsioen plangintza hobetuko da, baita gorabeherei erantzuteko gaitasuna ere.

“Teleirakurketaren sistema duela urte batzuk ezarri genuen: 2009an instalatu genituen lehen unitateak Irunen, eta 2015ean Hondarribian. Orain, sistema modernizatzen ari gara, komunikazio-teknologia aurreratuagoekin eta datu gehiago jaso eta transmititzeko gai diren ekipo zehatzagoekin”, adierazi du Leire Zubitur gerenteak. “Denbora errealeko informazioari eta adimen artifizialaren erabilerari esker, etxebizitzetan edo industrietan ihesak eta kontsumo anomaloak azkarrago detektatzeaz gain, sareko ihesak antzemateko ere baliatuko ditugu datuak, ur-baliabideen kudeaketa eraginkortasuna hobetuz”, gaineratu du. “Horrez gain, herritarrek orain arte bezala online sarbidea izango dute beren kontsumoen informaziora, baina orain analitika aurreratuagoarekin”, nabarmendu du Zubiturrek.

Kontagailu berriek LPWAN teknologia darabilte, Narrow Band IoT (NB-IoT) sisteman oinarritua, estaldura hobea eta energia-kontsumo txikiagoa bermatzeko. Modulu bakoitzak SIM txartel integratua du eta 5G bidez komunikatzen da, irakurketa-aldiak beharretara egokitzeko aukera emanez. Gailu horien bateriaren iraupena gutxienez 12 urtekoa da.

Gainera, urrunetik konfiguratzeko gaitasuna dutenez, kontagailuek datuak transmititzeko maiztasuna egokitu daiteke: eguneroko, orduko edo, behar izanez gero, minutuko irakurketak egin daitezke, kontsumoaren kontrol zehatza bermatzeko. Gaitasun horrek zerbitzuaren eraginkortasuna hobetzeko aukera berriak zabaltzen ditu, baita gorabeherak berehala detektatzeko aukera ere.

Eragina eta onurak

Teleirakurketako kontagailu berriek ur-kontsumoaren kontrol zehatzagoa ahalbidetzeaz gain, gardentasuna eta erabiltzaileen esperientzia ere hobetuko dituzte. Herritarrek edonoiz izango dute beren kontsumo-datuak eskuratzeko aukera Abonatuaren Atariaren bidez, uraren erabilera arduratsua sustatuz. Onura nagusien artean honako hauek nabarmentzen dira:

● Hiri-uraren zikloaren kudeaketa eraginkorragoa, prozesuen digitalizazioari eta automatizazioari esker.

● Etxe eta enpresetako kontsumoaren optimizazioa, ur-galera eta baliabideen alferrikako erabilera murriztuz.

● Ihesak eta kontsumo anomaloak goiz detektatzea, datuen analisi aurreratuaren bidez.

● Gardentasun handiagoa eta herritarren kontsumo-kontrol errazagoa, kontsumo-datuetarako sarbide digital sinpleari esker.

● Ingurumen-inpaktu positiboa, energia-kontsumoa murriztuz eta eragiketa-kostuak minimizatuz.

Leire Zubitur gerenteak eguneratze honen garrantzia azpimarratu du: “Berrikuntza honek urrats esanguratsua dakar hiri-uraren zikloaren digitalizazioan, baliabideen eraginkortasuna eta jasangarritasuna hobetuz. Inbertsio honekin, zerbitzu zehatzago eta irisgarriago bat eskaintzeko apustua egiten jarraitzen dugu. Proiektu honek uraren kudeaketaren abangoardian kokatzen gaitu, digitalizazio eta eraginkortasun estandar europarrekin bat eginez”.

Bestalde, Irungo alkate Cristina Labordak adierazi duenez, “proiektu honek aurrerapauso berri bat dakar zerbitzu publikoen eraldaketa digitalean, horniduraren kalitatea hobetuz eta ur-kontsumoa optimizatuz”. Gainera, azpimarratu duenez, “Mankomunitateak proiektu berritzaileak bultzatzen jarraitzen du, Irun eta Hondarribia kudeaketa adimendunaren erreferente bihurtuz. Aldaketa klimatikoaren aurkako borrokan funtsezko elementua da hau. Berrikuntza eta jasangarritasunaren aldeko apustua egiten jarraitzen dugu, etorkizuneko belaunaldientzako zerbitzu moderno eta eraginkorra bermatzeko”, azpimarratu nahi izan du Labordak.

Mankomunitateko lehendakariak modernizazio honek herritarrengan duen zuzeneko eragina ere nabarmendu du: “Datuen azterketa aurreratuak epe luzerako kostuak murriztea ekar lezake, eta horrek etorkizunean tarifa doituagoak eskaintzea ahalbidetuko luke”.

Igor Enparan Hondarribiko alkateak ere bizilagunentzat dakarren hobekuntzan egin du azpimarra: “Teleirakurketako teknologia berriak hiri-uraren zikloaren hornidura modu eraginkorragoan kudeatzeko, gorabeherak goiz detektatzeko eta zerbitzu jasangarriagoa bermatzeko aukera emango digu. Mankomunitateak uraren zikloaren modernizazioarekiko eta berrikuntzarekiko duen konpromisoa sendotzen du, herritarrei zerbitzu gardenago, eraginkorrago eta ingurumenarekiko arduratsuago bat eskainiz. Jasangarritasuna gure hiriaren konpromisoa da, eta aurrerapauso honek norabide horretan jarraitzen laguntzen digu”.

Instalazio-prozesua

Kontagailuak aldatu aurretik, herritarrei jakinarazpena egingo zaie, eta informazio-kartel bat jarriko da eraikinen atarietan. Kontagailuak etxebizitzen barruan dauden kasuetan, Txingudiko Zerbitzuak harremanetan jarriko da abonatuekin hitzordua adosteko. Une jakin batean hornidura eten behar den kasuetan, aurrez abisua emango da.

Instalazio-lanak egingo dituzten langile guztiek beharrezko akreditazioa izango dute, segurtasuna eta konfiantza bermatzeko. Gainera, kontagailu zaharren ordez teleirakurketa-moduluak dituzten belaunaldi berriko kontagailuak jartzeak ez du inolako kosturik ekarriko abonatuentzat.

Ekimen honekin, Txingudiko Zerbitzuak-ek uraren kudeaketan duten lidergoa berresten du, berrikuntza eta digitalizazioa funtsezko tresna gisa, hiri-uraren zikloan zerbitzu eraginkorragoa, jasangarriagoa herritarrak erdigunean dituena eskaintzeko.

Txingudiko Zerbitzuak-ek uholdeei aurre egiteko babesa indartu du Bidasoa Behereko Hiri Drainatze Jasangarriaren Plan Zuzentzailearekin

Irun, 2025eko otsailaren 25a. Klima-aldaketaren eta muturreko fenomeno meteorologikoen ugaritzearen testuinguru globalean, Txingudiko Zerbitzuak-ek ingurumen-arriskuen kudeaketarekiko duen konpromisoa sendotu du, Bidasoa Behereko Hiri Drainatze Jasangarriaren Plan Zuzentzailearen bidez. Plan estrategiko honek uholdeen mehatxuari aurre egiteko irtenbide integral eta koordinatuak eskaintzen ditu, haien eragina arindu eta eskualdearen erresilientzia indartzea helburu duelarik.

Klima-aldaketari aurre egiteko plan estrategikoa

Plan honen helburu nagusia da Irungo eta Hondarribiko saneamendu- eta drainatze-sarearen funtzionamenduaren modelizazioa eta diagnostikoa hobetzea, euri-uren kudeaketa optimizatuz eta hiri-uholdeak izateko arriskua murriztuz. Horrez gain, eskualdeko uholdeen arazoari buruzko informazio guztia dokumentu bakar batean zentralizatzen du, erabakiak hartzea errazteko.

Txingudiko Zerbitzuen zuzendari nagusi Leire Zubiturrek azaldu duenez, “arazo kritikoenak identifikatu dira eta irtenbideak proposatu dira azpiegitura giltzarrietan oinarrituta, hala nola euria metatzeko biltegiak, euri- eta hondakin-urentzako hodi bereiziak eta hobekuntza teknologikoak dituzten ponpaketa-estazioak”. “Muturreko fenomeno meteorologikoak ugarituz joan daitezke klima-aldaketaren ondorioz, eta, horregatik, ezinbestekoa da Hiri Drainatze Jasangarriaren Plan hau izatea arriskua murrizteko eta etorkizuneko krisiei aurre egiteko gaitasuna sendotzeko”, nabarmendu du Zubiturrek.

Txingudiko Zerbitzuen gerente Leire Zubiturrek azaldu duenez, “arazo kritikoenak identifikatu dira, eta irtenbideak proposatu funtsezko azpiegituren bitartez; hala nola euri-urak metatzeko biltegiak, euri- eta hondakin-urentzako hodi bereiziak eta hobekuntza teknologikoak dituzten ponpaketa-estazioak”. Zubiturrek nabarmendu duenez, “muturreko fenomeno meteorologikoak ugarituz joan daitezke klima-aldaketaren ondorioz, eta, horregatik, ezinbestekoa da Hiri Drainatze Jasangarriaren Plan hau izatea, arriskua murrizteko ez ezik, etorkizuneko krisiei aurre egiteko gaitasuna sendotzeko ere”.

Planaren onarpena mugarri den arren, urteetako lan gogorraren eta hainbat administrazioren arteko lankidetzaren emaitza da. Zubiturrek gogorarazi duenez, “aspalditik ari gara lanean uholdeak gutxitzeko irtenbideak bilatzen. Plan hau beste urrats bat da duela urte batzuk hasitako bidean, gainontzeko administrazioekin eta herritarrekin lankidetzan. Gainera, Garapen Jasangarrirako Helburuekin (GJH) eta ekonomia zirkularraren printzipioekin bat dator”.

2020an ur-azpiegiturak eguneratzeko egindako azken ikerketan oinarrituta, plan honek uholdeen kudeaketari buruzko informazio guztia biltzen du eta erronka honi aurre egiteko beharrezko inbertsioak definitzen ditu. “Funtsezko tresna da 2025 eta 2034 urteen artean gauzatuko diren inbertsioen plangintza egiteko, Bidasoa eskualdeko uholdeen arriskua minimizatzeko helburuarekin”, gehitu du Zubiturrek.

Plana bost fasetan garatu da:

- Eredu hidrologiko eta hidraulikoaren sorrera, hirian eta ingurune naturalean urak nola zirkulatzen duen ulertzeko. Mapetan eta erregistroetan falta diren datuak ere identifikatu dira, eta euri historikoak eta maila- eta emari-neurgailuak aztertu dira.

- Sarearen funtzionamenduaren diagnostikoa. Euriteek eta mareek eragindako uholdeak aztertu dira, bai eta sareak gainezka egiten duen eremuak eta horrek sortzen dituen arazoak ere.

- Hiri-hazkundearen analisia, etorkizunean hirigintza-garapenak drainatze-sistemari nola eragin diezaiokeen aurreikusteko.

- Sarearen konponbideak definitzea, hobekuntza-lanak, emarien erregulazio-neurriak eta larrialdi-egoeren analisia barne hartuta.

- Inbertsioen plangintza, hobekuntzak modu mailakatuan eta eraginkorrean gauzatzeko.

Erakundeen arteko koordinazioa kudeaketa eraginkorrerako

Klima-aldaketaren ondorioz, uholdeak gero eta maizago gertatzen ari dira, eta jatorri desberdina izan dezakete; itsasertzeko uholdeak (mareen eta ekaitzen ondorioz), ibaien uholdeak (ibaien gainezkapenaren ondorioz) eta euri-uholdeak (eurite bortitzen ondorioz).

“Uholde mota bakoitza erakunde eta administrazio ezberdinen esku dago: itsasertzeko uholdeak Kosta Zerbitzuek kudeatzen dituzte, ibaien uholdeak Konfederazio Hidrografikoak eta Uraren Euskal Agentziak, eta tokiko euri-uholdeak Txingudiko Zerbitzuakek”, azaldu du Zubiturrek. “Elkarrekin koordinatuta lan egiten dugu, estrategia-plangintza baten baitan, hala nola Plan Hidrologikoaren eta Uholde Arriskuen Minimizazio Planaren bidez, eskualdean gerta daitezkeen uholdeak prebenitu eta haien aurrean izan genezakeen erantzuna hobetzeko”, azpimarratu du.

Eskualdeko estolderia-sistemaren kudeaketaren arduradun gisa, Txingudiko Zerbitzuak-ek hondakin-urak behar bezala drainatu eta tratatzen direla bermatzen du. Horretarako, estolderia-sarea mantendu eta garbitzen da, azpiegitura berriak planifikatu eta eraiki, ingurumen-araudia betetzeko isurketak kudeatu eta hondakin-uren sarea eta araztegiak handitu eta hobetu.

Uholde-arriskua murrizteko inbertsioak

Txingudiko Zerbitzuak-ek dagoeneko hainbat hobekuntza egin ditu estolderia-sarean, kolektore berriak instalatuz eta lehendik dauden azpiegiturak berrituz. Etorkizunari begira, 2025etik aurrera gauzatuko diren inbertsio berriak aurreikusi dira, uraren kudeaketa eraginkorragoa eta jasangarriagoa bermatzeko:

- Euri-ur biltegiak eraikitzea, euri-jasa handietan ur soberakinak biltegiratzeko eta kudeatzeko:

Gal
Amute
Alameda
San Pablo

- Sare bereizlea zabaltzea, sare unitarioaren karga arintzeko eta uholdeak maiz gertatzen diren auzoetan isurketak ekiditeko.

- Ponpaketa-estazioak eta gainezkabideak modernizatzea, haien gaitasuna eta efizientzia hobetzeko.

- Arrisku-eremuetan azpiegitura hidraulikoak indartzea, Irungo eta Hondarribiko puntu zaurgarrienetan neurri espezifikoak ezarriz.

Proiektu horiei esker, euri-jasetan ura modu eraginkorrean kudeatuko da, eta nabarmen murriztuko dira hiriguneetako gainezkatzeak. Lanen aurrekontua 34 milioi eurokoa da, eta finantzaketaren zati bat udalaz gaindiko ekarpenen eta Europako funtsen bidez lortuko da.

Normala da azken hilabeteetan euriteek beste lurralde batzuetan eragindako kalteak ikusita eskualdeko bizilagunak kezkatuta egotea. Hala ere, Irungo alkate Cristina Labordak nabarmendu du erantzuna argia dela: plangintza, inbertsioa eta ekintza, betiere helburu berarekin: Irun eta Hondarribia leku seguru eta erresiliente bihurtzea.

Bestalde, Igor Enparan Hondarribiko alkateak azpimarratu du Plan Zuzentzaile honen helburua ez dela soilik uholde-arriskua murriztea, baizik eta klima-aldaketaren aurrean eskualdearen erresilientzia indartzea. Haren hitzetan, "Bidasoa Behereko Hiri Drainatze Jasangarriaren Plan Zuzentzailea funtsezko tresna da klima-aldaketari aurrea hartzeko eta saneamendu-sistema eraginkorra bermatzeko".

Ekimen honen bidez, Irunek eta Hondarribiak aurrerapauso handia ematen dute euri-jasen aurkako babes-sisteman, herritarren segurtasuna indartuz eta hiri-garapen erresiliente eta jasangarria bermatuz. Txingudiko Zerbitzuak-ek uraren kudeaketa arduratsuarekin eta etorkizun seguruago zein jasangarriago baterako plangintza estrategikoarekin duen konpromisoa berretsi du.

Txingudiko Zerbitzuakek Hiri Hondakinen Kudeaketarako Ordenantza berria arautuko du; eraginkorragoa, jasangarriagoa eta birziklapenarekin konprometitua

Ordenantza berriak 2001etik indarrean dagoena ordezkatuko du.
Testua jendaurrean jarriko da, herritarrek alegazioak edo proposamenak aurkeztu ahal izan ditzaten.

Txingudiko Zerbitzuen Mankomunitateak behin-behinean onartu du Hiri Hondakinen Kudeaketarako Ordenantza berria, tokiko araudia eguneratzeko eta eskaintzen diren zerbitzu guztiak biltzeko. Ordenantza berriak lege-eskakizunekin nahiz egungo ingurumen-erronkekin bat egiten du. Ordenantza honek 2001etik indarrean dagoena ordezkatuko du, eta Estatuko legeak beteko direla bermatzeaz gain (esaterako, 7/2022 Legea, Hondakin eta Lurzoru Kutsatuei buruzkoa, edo 1055/2022 Errege Dekretua, Ontzien eta Ontzi Hondakinen kudeaketari buruzkoa), hondakinen kudeaketa eraginkorragoa, jasangarriagoa eta birziklapenarekin konprometituagoa sustatzen du.

Behin-behinean onartutako testua jendaurrean egongo da 30 egunez, otsailaren 4tik aurrera. Epe horretan, herritarrek dokumentua kontsultatu ahal izango dute www.txinzer.eus webgunean, eta alegazioak edo proposamenak aurkezteko aukera dute ondorengo bideetako bat erabilita:

● Txingudiko Zerbitzuen Mankomunitateko Erregistro Orokorrean, Irungo Juncal kalean (26. zk.), astelehenetik ostiralera, 08:30etik 14:00era. Aldez aurretik hitzordua eskatu behar da 900 119 384 telefonoan edo txingudi@txinzer.eus helbidera idatziz.

● Administrazio Publikoen Administrazio Prozedura Erkidearen Legearen 16. artikuluan ezarritako puntuetan.

● www.txinzer.eus webgunean horretarako gaitutako estekaren bidez.

Egungo beharretara egokitutako araudia

Leire Zubitur Txingudiko Zerbitzuetako gerentea adierazi du ordenantza berria funtsezko urratsa dela hondakinen kudeaketa modernizatzeko: “Azken urteotan gure zerbitzuak asko aldatu dira. Orain, lehen existitzen ez ziren zerbitzuak arautu ditzakegu, hala nola materia organikoaren bilketa,horez gain, berariazko araudirik ez zuten zerbitzuak ere abrne hartzen ditu, hala nola, garbiguneen erabilera. Helburu nagusia da lege-araudiak betetzea, birziklapena erraztea eta eskualdeko ingurumen-inpaktua murriztea.”

Gainera, Estatuko araudi berrietara egokitzeaz gain, ordenantzak Espainiako Ekonomia Zirkularreko Estrategiaren (España Circular 2030) eta 2021-2023 Ekintza Planaren printzipioak barne hartzen ditu. “2001ean, ez zen ekonomia zirkularrari edo birziklapen-helburuei buruzko aipamenik egiten, orduan ez baitzeuden araudi horiek”, azaldu du Zubiturrek.

Ordenantzaren berrikuntza nagusiak

“Ordenantza honetan jasotako berrikuntza guztiak jasangarritasunarekin dugun konpromisoarekin eta birziklapen-helburuak betetzearekin bat datoz”, adierazi du Zubiturrek.

Horretarako, zerbitzu modalitate desberdinak eskaintzen dira, erabiltzaile guztiek edozein eremutan hondakinak bereizteko betebeharra bete ahal izan dezaten: etxeetan, ostalaritzan eta merkataritzan, industrian, jende asko biltzen duten ekitaldi publikoetan, etab.

Zerbitzu-ordenantzak barne hartzen ditu Txingudiko Zerbitzuen betebeharrak, eman behar dituen hondakinak biltzeko eta garraiatzeko zerbitzuei dagokienez, bai eta erabiltzaileek (etxeak, ostalaritza, merkataritza, industriak, etab.) eta hiri-hondakinen ekoizleek dituzten betebeharrak ere, hondakinak behar bezala bereizteari eta entregatzeari dagokionez, dagokion bilketa-zerbitzuaren arabera.

Ordenantza hiru zatitan banatuta dago. Lehenengo zatia aplikatu beharreko araubide juridikoari eta hainbat lege-definiziori buruzkoa da. Bigarren zatian, ematen diren bilketa-zerbitzu guztiak eta erabiltzaileen betebeharrak jasotzen dira. Hiri-eremuko bilketa-zerbitzuak azaltzen dira, lehenik; edukiontzi-motak, bilketa-zatiak, eta abar. Gainera, bi atal zehatz daude industrialdeetan biltzeko, hala nola hondakin-sortzaile handientzat. Era berean, garbiguneak erabiltzeko arauak zehazten dira: erabiltzaile posibleak, hondakin onargarriak, etab.

Azkenik, zehapen-araubidearen kapituluak ordenantza betetzen dela ikuskatzeko eta kontrolatzeko lanak, arau-hauste eta zehapen motak eta zehapen-prozedura biltzen ditu.

Prozesu ireki eta parte-hartzailea

Ordenantza berria prestatzerakoan herritarren parte-hartzea sustatu da. “Testuak eskualdeko beharrak islatu zitzan nahi genuen, eta horregatik ireki genuen herritarrek eta eragileek proposamenak aurkezteko kontsulta-aldi bat”, azaldu du Irungo alkate Cristina Labordak. Mankomunitateak behin-behinean ordenantza onartu ondoren, testua jendaurrean jarriko da herritarrek alegazioak aurkez ditzaten, behin betiko onartu aurretik.

“Jasangarritasuna gure hiriaren etorkizunerako funtsezko zutabea da. Ordenantza honekin ez gara soilik lege-eskarietara egokitzen, hori baino askoz gehiago da: Txingudiko Zerbitzuen konpromisoaren erakusgarri da. 22 urteren ostean, araudia eguneratu dugu gure eskualdearen egungo beharretara egokitzeko. Baina garrantzitsuena da nola osatu dugun ordenantza hau: entzunez. Eragilee, auzokideei, herritarrei entzunez. Modu honetara bakarrik eraiki dezakegu guztiontzat izango den eta etorkizuneko erronketarako prestatuta egongo den Mankomunitatea.”

Igor Enparan Hondarribiko alkateak azaldu duenez, “ordenantza honek Txingudiko eskualdeak ekonomia zirkularrarekin eta bere ingurune naturalaren babesarekin duen konpromisoa islatzen du. Garbiguneak eta biohondakinen gaikako bilketa bezalako zerbitzuak sartzea funtsezkoa da kudeaketa jasangarriago eta eraginkorrago baterako. Hondakinen kudeaketa egokia erronka bat den testuinguru global batean, gure erantzuna gure kaleetan eta udalerrietan hasten da. Ordenantza honekin, Txingudiko Zerbitzuak-ek bere eboluzio gaitasuna eta egungo beharrei erantzuteko borondatea erakusten du ".

Ekimen honen bidez, Txingudiko Zerbitzuen Mankomunitateak bere konpromisoa sendotzen du jasangarritasunarekin, modernizazioarekin eta herritarren parte-hartzearekin, eskualde osoarentzako etorkizun garbiago eta arduratsuago baterantz aurrera eginez.

Albiste gehiago...