Bidasoa Behera, 2026ko ekainak 4. Txingudiko Zerbitzuak-ek beste urte batez hartuko du parte Bioterran, asteburu honetan Ficoban egingo den produktu ekologikoen, bioeraikuntzaren, energia berriztagarrien eta kontsumo arduratsuaren azokan. Bertan izango da Merka2dasoaren edizio berri batekin; berrerabilpena eta mugikortasun jasangarria sustatzea helburu duen bigarren eskuko bizikleten azoka.
Ekimenari esker, herritarrek egoera onean dauden bigarren eskuko bizikletak erosi eta saldu ahal izango dituzte. Helburua da, batetik, bizikleten erabilera bizitza luzatzea, eta bestetik, mugikortasun eredu jasangarriagoak sustatzea.
Azokak iraungo duen hiru egunetan, bisitariek Txingudiko Zerbitzuak-en gunera hurbiltzeko aukera izango dute Merka2dasoaren funtzionamendua ezagutzeko eta salgai dauden bizikletak ikusteko. Era berean, bizikleta bat saldu nahi duten pertsonek azokan bertan uzten jarraitu ahal izango dute, betiere horretarako lekua badago.
Aurtengoa Txingudiko Zerbitzuak-en hamargarren parte-hartzea izango da Bioterran. Hori dela eta, azokako antolakuntzak aitortza berezia egingo dio ostiral honetan, 12:00etan, urte hauetan guztietan egindako ibilbideagatik eta lankidetzagatik.
Ingurumenaren aldeko lanarekin lotutako ibilbidea
Txingudiko Zerbitzuak-ek Bioterran izan duen presentziaren ezaugarri nagusia iraunkortasunarekin eta ingurumen hezkuntzarekin lotutako ekimenak herritarrengana hurbiltzea izan da.
2016 eta 2019 urte bitarteetako parte-hartzeetan ExpoRetrete izan zen erakusgai. Saneamendu sareen erabilera egokia sustatzeko sortutako erakusketa ibiltari eta interaktiboa zen. Gune eta material ezberdinen bidez, komunetik desegoki botatzen diren hondakinek —hala nola toailatxo hezeek, koipeek edo bestelako produktuek— sortzen dituzten arazoak azaltzen ziren. Ekimena Leire Zubitur erakundeko gerenteak eskainitako hitzaldi dibulgatzaileekin osatzen zen, ohitura horiek ingurumenean duten eraginean sakontzeko aukera eskainiz.
Proposamenak harrera bikaina izan zuen bisitarien artean. 2019ko edizioan, esaterako, 2.000 lagunetik gora igaro ziren erakusketatik azokak iraun zuen hiru egunetan, eta urte hartako ekimen aipagarrienetako bat bihurtu zen.
Ondoren, 2020 eta 2022 artean, Txingudiko Zerbitzueak-ek parte-hartze aktiboagoa sustatzen zuten formatuen aldeko apustua egin zuen ingurumenarekin lotutako Escape Hall baten bidez. Proben eta dinamiken bitartez, parte-hartzaileek ura, hondakinak, kontsumo arduratsua eta Garapen Jasangarrirako Helburuak bezalako gaietan hausnartzeko aukera izan zuten. Edizio ezberdinek ehunka lagun bildu zituzten eta balorazio oso positiboa jaso zuten.
2023an, erakundearen presentzia BidaSOS2030 kanpainan oinarritu zen, materia organikoaren gaikako bilketa eta edukiontzi marroiaren erabilera sustatzeko sentsibilizazio ekintzen bidez. Informazio guneak aukera eman zuen herritarrei zerbitzu horren inguruko azalpenak emateko eta gaikako bilketan zein konpostajean parte hartzea errazteko materialak banatzeko.
2024az geroztik, Txingudiko Zerbitzuak-ek Bioterran duten presentzia Merka2dasoa ekimenaren inguruan egituratzen da. Bigarren eskuko bizikleten salerosketaren bidez berrerabilpena, ekonomia zirkularra eta mugikortasun jasangarria sustatzea du helburu ekimen honek.
Jasangarritasunarekiko konpromisoa
Urte hauetan guztietan, Bioterra topagune garrantzitsua bihurtu da Txingudiko Zerbitzuak eta herritarren artean, jasangarritasunarekin lotutako proiektuak, eta ekimenak ezagutarazteko.
Aurtengo edizioan jasoko duen aitortzak balioan jartzen du ingurumenaren, eta ohitura arduratsuen sustapenean oinarritutako ibilbidea. Izan ere, urte hauetan zehar ura, hondakinen kudeaketa, mugikortasun jasangarria eta ekonomia zirkularra bezalako gaiak herritarrengana hurbiltzeko lan egin du erakundeak.
