Gaurkotasuna

Merkatua irailaren 20an egingo da Zabaltza plazan, eta 120 plaza izango dira erabilitako bizikletak eta patinete elektrikoak salgai jartzeko.

Irun, 2026ko irailaren 9a. Datorren igandean, irailaren 20an, mugikortasunari eskainitako Merka2dasoa ekimenaren beste edizio bat egingo da Irungo Zabaltza plazan. Merkatuan bigarren eskuko bizikletak eta patinete elektrikoak erosi eta saldu ahal izango dira, Mugikortasunaren Europako Astearen barruan.

Bizikleta edo patinete elektriko bat salgai jarri nahi dutenek aldez aurretik eman beharko dute izena, www.txinzer.eus/merka2dasoa webgunean eta salgai jarriko den artikulu bakoitzagatik bete beharko da. Parte hartzea doakoa izango da, eta aurten 120 plaza eskainiko dira.

Salgai jartzen den material guztiak erabilia izan beharko du eta egoera onean egon. Ez da bestelako osagarririk onartuko, hala nola txirrindularientzako arropa edo kaskoak. Bizikleta edo patinete elektriko bakoitzaren gehieneko salmenta prezioa 600 eurokoa izango da.

Materiala merkatuaren egunean bertan entregatuko da

Izena emateko prozesuan, saltzaileek fitxa bana bete beharko dute salgai jarri nahi duten bizikleta edo patinete elektriko bakoitzeko. Horrez gain, hitzordua aukeratu beharko dute materiala merkatuaren goizean erregistratzeko.

Materiala irailaren 20an, igandean, entregatuko da, 08:30etik 10:00etara, Merka2dasoaren informazio gunean. Pertsona bakoitzak hitzordu bakarra erreserbatu beharko du, izena emandako bizikleta edo patinete elektrikoen kopurua edozein dela ere.

Izena emateko epea zabalik egongo da erabilgarri dauden 120 plazak bete arte edo, beranduenez, irailaren 16ra arte, asteazkena.

Merkatua 10:30etik 14:00etara egongo da zabalik

Materiala erregistratu ondoren, antolatzaileek salgai jarriko dute eta salerosketarako ezarritako prozedura kudeatuko dute.

Merkatua 10:30etik 14:00etara egongo da herritarrentzat zabalik Zabaltza plazan. Ordutegi horretan, herritarrak bertaratu ahal izango dira salgai dauden bizikletak eta patinete elektrikoak ikusteko eta interesatzen zaizkienak erosteko.

Merka2dasoa berrerabilera sustatzeko eta objektuen bizitza erabilgarria luzatzeko ekimena da. Mugikortasunari eskainitako edizio honek aukera emango du jabeek jada erabiltzen ez dituzten bizikletei eta patinete elektrikoei beste erabilera bat emateko eta berriz ere zirkulazioan jartzeko.

Bidasoa Beherea, 2026ko irailaren 9a. Txingudiko Zerbitzuak urte hasieratik ari da bere webgunea berritzeko lanean. Proiektua azken fasean dago, eta webgune berria datozen asteetan jarriko da martxan.

Lana egungo webgunearen eta informazioa antolatzeko moduaren berrikusketatik abiatu da. Azterketa horren ondoren, egitura berria definitu da, eta edukiak berrikusten eta eguneratzen ari dira. Helburua da txinzer.eus webgunera jotzen duten pertsonek behar duten informazioa errazago aurkitu ahal izatea.

Berritzeak diseinu berria eta nabigazioan egindako aldaketak ere jasotzen ditu. Webgunea gailu mugikorretatik behar bezala kontsultatu ahal izateko egokituta egongo da, eta sektore publikoko webguneetarako ezarritako irisgarritasun-baldintzak beteko ditu.

Ur-hornidurari eta saneamenduari, hondakinei, hiri-garbiketari eta jasangarritasunari buruzko informazioa beste modu batera antolatuko da. Era berean, bezeroentzako informazioa, Gardentasun Ataria, lan-eskaintzak, albisteak eta prentsa-aretoa berrikusiko dira. Plataforma berria, gainera, proiektuak aurrera egin ahala funtzionalitate berriak txertatu ahal izateko garatu da.

Txingudiko Zerbitzuak-en webgune berria txinzer.eus helbidean egongo da eskuragarri datozen asteetan.

Hondarribia, 2026ko irailaren 3a. Txingudiko Zerbitzuak-ek eta Hondarribiko Udalak jaietarako garbiketa eta hondakin bilketa dispositiboa prestatu dute. Abuztuaren 30etik irailaren 12ra egongo da martxan. Epe horretan, ohiko lantaldeak eta baliabideak indartuko dira, kaleetako jardueraren eta sortutako hondakinen hazkundeari erantzuteko.

“Jaietan hainbat egunez jarduera handia izaten da Hondarribiko hainbat gunetan”, azaldu du Ortzi Alonso Hondarribiko Udaleko Kultura zinegotziak. “Txingudiko Zerbitzuak-ekin elkarlanean aritzeak aukera ematen digu jende gehien biltzen den egunetan garbiketa eta hondakin bilketa indartzeko».

Indartze lanak zortzi egunetan bilduko dira. Guztira, 125 lanaldi gehigarri aurreikusi dira, jarduera handieneko egunetan ohiko lanak indartzeko. Lanek 52.102,73 euroko kostua izango du guztira, ohiko zerbitzuak baino % 82,69 gehiago.

“Jaietan kaleetako jarduera nabarmen handitzen da, eta zerbitzuak egoera horretara egokitu behar ditugu. Horregatik, garbiketa eta hondakin bilketa indartzeko esfortzuak handitu dugu” azaldu du Leire Zubitur Txingudiko Zerbitzuak-eko gerenteak.

“Egun bakoitzeko beharretara egokitzeko moduko dispositiboa prestatu dugu. Jarduera handiena dagoen lekuetan baliabide gehiago jarriko ditugu”, adierazi du Valentín Gonzalez Txingudiko Zerbitzuak-eko Hondakinen eta Hiri Garbiketaren Saileko arduradunak. “Lantaldeak goizean goiz hasiko dira lanean, gauean zehar jarduera handiena duten guneak garbitzeko”.

Hondakinak gaika biltzeko 17 gune

Hondakin bilketa ere baliabide gehigarriekin indartuko da. Txingudiko Zerbitzuak-ek hondakinak gaika biltzeko 17 gune jarriko dituzte Hondarribiko hainbat tokitan. Jaietan jende gehien biltzea aurreikusten den eremuetan kokatuko dira.

Bentako sei txosnek ere baliabide bereziak izango dituzte. Txosna bakoitzak 120 litroko edukiontziak izango ditu. Kanpoaldean, guztiek erabiltzeko beirarentzako hiru iglu jarriko dira, baita ontziak eta kartoia biltzeko edukiontziak ere. Materia organikoa egunero bilduko da atez ateko zerbitzuaren bidez.

15.600 edalontzi berrerabilgarri sei txosnetarako

Txingudiko Zerbitzuak-ek 15.600 edalontzi berrerabilgarri banatuko dituzte hasiera batean sei txosnen artean, eta txosna bakoitzak 2.600 unitate jasoko ditu. Ohiko sistema erabiliko da: edalontzi bakoitzeko euro bateko gordailua ordainduko da. Jaietan nahi adina aldiz berrerabili ahal izango da, eta edalontzia itzultzean, gordailuan utzitako euroa berreskuratuko da.

Jaiak amaitutakoan, itzulitako edalontziak bilduko dira eta enpresa espezializatu batek garbituko ditu. Horrela, berriro erabiltzeko prest geratuko dira.

“Jaiak kalean bizi ditugu, eta horrek partekatzen ditugun espazioak zaintzea ere eskatzen du” adierazi du Ortzi Alonsok. “Hondakinak bereizteko eta gutxiago sortzeko baliabideak ditugu. Erabil ditzagun, eta zaindu dezagun Hondarribia guztion artean jai hauetan”.

Txingudiko Zerbitzuak-ek eta Hondarribiko Udalak hondakinak behar bezala bereiztearen garrantzia gogorarazi dute. Era berean, jaietarako prestatutako bilketa guneak erabiltzeko eskatu diete herritarrei. «Lan gehigarri hauek hondakin bilketa errazten du, baina jaietan parte hartzen dutenen laguntza ere beharrezkoa da”, adierazi du Zubiturrek.