“Birziklatzen lagunduko dizun ontzia”
Txingudiko Zerbitzuak elkarteak, oraingo honetan Euskadiko Kutxarekin elkarlanean, beste kanpaina bat abiarazi zuen 2006. urtean Behe Bidasoan, etxeko zaborretik birziklatzen zen portzentajea emendatzeko xedean.
Behe Bidasoako etxeetan etxeko hondakinak gaika biltzeko ontziaren banaketan oinarritu zen kanpaina hau. Ontzia oso tresna interesgarria izan zen gaikako bilketa egiteko, zaborraren hiru frakziori leku egiteko aproposa zelako, paretek betiko ontziei eragiten dien zurruntasunik ez zuelako; gisa honetan, zakuetako bat mukuru bete egin zitekeen albokoa erdi hutsik egon zitekeen bitartean, eta gainera estetikoki erakargarria bezain didaktikoa zen.
Txingudiko Zerbitzuak elkarteak gutun bat igorri zien haren bezero guztiei, eta gutun-azalaren barruan txartel bat helarazi zien gaikako bilketa egiteko sistema hau doan eskuratu zezaten. Horretarako interesatuak aipatutako gutunean zehaztutako ordutegi, egun eta lekuan azaldu behar zuen; han ingurumen hezitzaile batek 10 minutuko hitzaldia eskainiko zien bertaratutakoei euren hondakinak gaika nola bildu irakasteko edo hondakinak gaika hobeto nola bildu azaltzeko. Ontzi bat oparitu eta biztanleek hondakin birziklagarriak edukiontzietan uzteko garaian sortu ohi diren zalantzak argitzeko gida-liburuxka bat ematen zien hezitzaileak interesatuei.
Descargar carta a la ciudadanía
Kanpaina hau tokiko hedabideetan, nola tokiko telebista eta irratian hala tokiko prentsa idatzian eta aldizkarietan, argitara emandako iragarkiekin osatu zen.
Hain izan zen arrakastatsua kanpaina ontzi guztiak banatu zirela, 5.000 ale, eta 1.901 lagun gelditu ziren batere gabe. Mankomunitateak beste 2.000 ontzi erosi zituen, eta horiek 2007ko kanpainan ontzirik gabe geratu ziren pertsonen artean banatu ziren.
