Martxoaren 22an Uraren Munduko Eguna dela eta, Txingudiko Zerbitzuakek bisita gidatua antolatu du martxoaren 23an (igandea) Endarako urtegira eta Elordiko edateko uren araztegira, eskualdeko ur-horniduraren azpiegitura nagusiak gertutik ezagutzeko.
“Glaziarren kontserbazioa” lelopean, bisitak funtsezko ekosistema horiek babestearen garrantziaz kontzientziatzea du helburu, uraren zikloan eta mundu osoko milioika pertsonen bizitzan duen eraginagatik. Gure eskualdean glaziarrik ez badago ere, ezinbestekoa da “pentsatu globalki, jardun tokian-tokian” printzipioa barneratzea, eta ura eta energia arduraz eta modu jasangarrian kontsumitzea.
Bisitaren ibilbidea eta izen-ematea
Bisitan parte hartzeko aukera herritar gehoagok izan dezaten, bi talde antolatuko dira:
- A taldeak Elordiko ETAPen hasiko du bisita. Bertan, Irungo eta Hondarribiko ur-hornidura bermatzen duen prozesua gertutik ezagutzeko aukera izango dute parte-hartzaileek. Ondoren, Endarako urtegira joango dira, uraren garraio-sistema ezagutzeko.
- B taldeak alderantzizko ordenan egingo du ibilbidea, Endarako urtegitik abiatuta.
Bisita doakoa izango da, autobus zerbitzua izango da parte-hartzaileentzat eta euskaraz zein gaztelaniaz egin ahal izango da. Jarduerak bost ordu inguruko iraupena izango du, autobuseko joan-etorriak barne.
Interesa dutenek martxoaren 5etik aurrera eman ahalko dute izena formulario honetatik. Bertan, bisita-txanda eta autobus geltokia aukeratu beharko dute. 100 plaza egongo dira eskuragarri, eta izen-emate hurrenkeraren arabera esleituko dira.
Arrakasta handia duen ekimena
“Bisita gidatuek arrakasta handia izan dute aurreko edizioetan, eta berehala bete ohi dira eskuragarri jarritako plaza guztiak. Ingurumen-kontzientzia gero eta handiagoa da, eta edateko uraren kudeaketa ezagutzeko interesa areagotzen ari da. Hori dela eta, ekintza hau aukera paregabea da bizitzarako ezinbesteko baliabide bat gertutik ezagutzeko”, adierazi du Leire Zubitur gerenteak. Txingudiko Zerbitzuetatik herritarrak animatzen ditugu bisita honetan parte har dezaten eta urak gure etxeetara iritsi arte egiten duen ibilbidea bertatik bertara ezagutu dezaten.
Ez galdu aukera eta eman izena!