- Irun eta Hondarribiko alkateek eta Leire Zubiturrek, Txingudiko Zerbitzuakeko gerenteak, jaso dute gaur arratsaldean saria Madrilen.
- Materia organikoa behar bezala banatzen duten familien alde egitean oinarritutako tasa-politika aitortzen du sariak.
Txingudiko Zerbitzuakek sari berri bat jaso du jasangarritasunaren alde egindako politikengatik. Oraingo honetan, ATEGRUSek, Hondakinak eta Ingurumena Kudeatzeko Elkarte Teknikoak, Txingudiko Zerbitzuakek aplikatutako tasen politika nabarmendu du, edukiontzi marroiaren erabilera zuzena sustatzen duena. 2021ean, banaketa egokia egiten duen etxebizitza baten eta egiten ez duenaren arteko tasaren aldea urtean 55,96 eurokoa izan zen.
Irungo eta Hondarribiko alkateek, Jose Antonio Santanok eta Txomin Sagarzazuk, hurrenez hurren, Leire Zubitur Txingudiko Zerbitzuetako gerentearekin batera, Madrilgo Ifema azoka-barrutian “Platinozko erratza” jaso dute gaur arratsaldean.
Irungo alkate JosĂ© Antonio Santanok azaldu duen bezala, birziklatze-tasa urtez urte hobetzen jarraitzeko beharrari erantzuten dio politika horrek, “azken urteetan birziklatze-tasaren igoera handia izan da, eta 2021ean 2025erako ezarritako %55eko Europako helburua gainditzea lortu dugu”. Bestalde, Txomin Sagarzazuk, Hondarribiko alkateak, azpimarratu du hobetzen jarraitzeko gakoa edukiontzi marroia edo materia organikoan dagoela, “horregatik, familia jasangarriak deritzonei tasak izoztea erabaki genuen iaz, eta edukiontzi marroia erabiltzen ez dutenei, ordea, igotzea”.
Leire Zubiturrek eskualdean edukiontzi marroia eraginkortasunez erabiltzen duten familiak zoriondu nahi izan ditu. “Materia organikoaren gaikako bilketarekin bat egiten duten etxeak geroz eta gehiago dira, 2021ean 18.240 etxebizitza izan ziren eta pertsona horiei guztiei esker aurrera egiten ari gara pausu sendoz jasangarritasunerantz”.
Hirugarren aldia da Txingudiko Zerbitzuakek saria jasotzen duena, Bidasoa Behereko eskualdeen bizi-kalitatea eta iraunkortasuna hobetzeko balio duten aurrerapen teknologikoak eta kontzientziaziokoak sustatzeko egindako ahaleginagatik. Aurreko aldietan, epaimahaiak bilketa zerbitzuaren kudeaketaren sistema berritzailea eta kudeaketa integratuari aplikatutako teknologia nabarmendu zituen.
ATEGRUSek saritzen ditu gure hiri eta industrietako hiri-hondakinen, garbiketaren eta, oro har, hiri-garbitasunaren kudeaketarekin lotutako alderdi guztiak hobetzeko ekimenengatik nabarmentzen diren erakunde eta organismoei, eta aurtengoa hemezortzigarren edizioa da.
